قصيدة (الرقص ) للشاعر عبد الرحيم منصور

رقصنى .. رقص يا جدع
دى حبيبتى غاوية الدلع
رقصنى هاتوا العصى .. وغنوا الحبيب
نلعب وندفن تعبنا فى رقصة التحطيب
رقصنى مش ع الكمان
مش ع الوتر
شدوا الربابه من جريد النخل
حاسبوا الجريد الدكر
فوتوا المراجع للوتر
رقصنى يا جدع
ديه حبيبتى غاويه الدلع
راح نرتمى .. ونرتمى .. وندوب
وأسقيكى خروع .. عرقسوس .. خروب
راح نترمى .. وأرتمى ونموت
يحيا ويتفرع علينا التوت
وأبخ فيكى بحر أنفاسى
ناسى أنا ناسى
رقصنى يا جدع
ديه حبيبتى غاوية الدلع
يا جريد يا نخل
وفى العلالى دوالى
سلم ولا تطاطى
سلم على الأيدين
طالعه عليك .. مجروحين
مش للى مستنى وهوه في الواطى
سيبك من المحبوب
ديه فوق سريرها تحلب المكتوب
رقصنى يا جدع
رقصنى يا جدع

» اجمل قصيدة للشاعر هشام الجخ (جحا)
» قصيدة للشاعر فؤاد حداد (ادب ودنيا)
» قصيدة ايوه بغير للشاعر هشام الجخ
» شاهد الرقص الالى على اصلوا للفزيع مايكل
» عم بطاطا للشاعر جمال بخيت