انواع الرجال (types of men)

Types of men
بصراحة ماكنتش ناوي اخلي دي فكرة الموضوع..لكن لقيت ان في ناس فاهمه الحكاية غلط..
من ناحية البنات، في بنات فاكره ان كل الولاد نوع واحد..أو ببساطة نوعين، صادق وخاين..!
على أد ما الموضوع ده موجه للولاد بشكل عام، فهو برده موجه للبنات أكتر..
ليه ؟
عشان وانتي بتقري الموضوع ده هتعرفي حاجات جديدة، ولو فكرتي فيها هتلاقيها حواليكي فعلاً..

بوجه عام..الرجاله 3 أنواع..

Classic man
الراجل التقليدي..أو الكلاسيكي لو عايز يبقى ليها اسم شيك شوية..
أو زي ما بيتقال عليه..الراجل الممل..!
آه ممل..، زي ما قولت قبل كده البنت عايزه تعيش مع الي بتحبه حاجة مش تقليدية..حاجة مش معتادة، جديدة عليها، عشان كده في معظم الأحوال الراجل التقليدي، أو الراجل الدوغري راجل بالنسبة ليها ممل..حتى لو مش عايزه تعترف بكدة..
آه عارف ان ده الطريق المحترم وكل حاجة..لكن ايه المانع تبقى كده وبرده يبقى عندك شوية لعب وتجديد وحركات كدة..شوية مغامرات تخليها مش عارفة كل مرة هتشوفها فيها هتوديها فين..1000 واحد ممكن يوديها كافيه، 1000 واحد ممكن يوديها فيلم تامر حسني الجديد..1000000 واحد ممكن يتمشى معاها عالكورنيش..
على حسب شخصيتك والحاجات الي بتحبها..فكر وابتكر حاجات غير الي فاتت..
وأهم حاجة انك تعمل حاجة بتحبها..لما تبقى بتعمل حاجة بتحبها..مشاعر السعادة الي جواك بتخلي كل حاجة سهلة..حتى الحاجات الي كنت شايف انك مستحيل تعملها..
السعادة الي بتحس بيها، خصوصاً لما تجرب حاجة لأول مرة..هتسهل عليك حاجات كتييييييير..


Nice man

"وانا كمان بحبك..بس زي أخويا، وصدقني كده أحسن ، انا بحب اشكيلك واحكيلك همي ومشاكلي..برتاح معاك أكتر في الكلام عن أي حد..خلينا اخوات احسن"
سمعتها قبل كده صح ؟؟
ده عشان انت النوع ده..الراجل اللطيف..
النوع الي بيقول كل الكلام الحلو اللطيف للبنت..بيخاف يكلمها بأي طريقة تانية ، حتى لو هيتريق بهزار عشان ما يزعلهاش..يزعلها ازاي ، دي لما تزعل ممكن تسيبه..!!
هقولك حاجة جميلة جداً سمعتها قبل كدة ..
طبيب نفسي..كان بيتكلم في المجال ده، بيقول ان في فرق بين الـ
Gentle Man والـ Gentleman !
الأولى..الي من غير مسافات هو الراجل الطبيعي..جنتل آه بس في نفس الوقت "رجل"..اللطف ما بيأثرش على كونه رجل ويخليه يبقى ألطف من اللازم مع البنت..ده الطبيعي.
التانية بقى..الي فيها مسافة بين "جينتل" و "مان"..
آه زي مانتا بتفكر بالظبط..الراجل الي بيحاول يكون ألطف من اللازم..بيفصل رجولته عن الجنتله دي..
باختصار، النوع ده بيشوف كل الكلام الحلو ، والي يضحك البنت من غير ما يزعلها..كل الكلام الرومانتك، صدقني فرصتك الوحيدة ان ده ينفع ان ما يبقاش في منافسة من حد تاني..خصوصاً لو كان من النوع التالت الي هتكلم عليه كمان شوية..
طيب تعمل ايه..
99% من أصل المشكلة دي حاجتين..

1 – يا إما انت اتعودت انك ترضي كل الي حوالليك..وبقى ده تصرف طبيعي عندك.
بس دي مش مسئوليتك انك ترضيها..أو على الأقل مش مسئوليتك لواحدك..انت حتى بتعكس طبيعة علم النفس..

لأن في التعامل مع البشر في نوعين من السلوك..
Win –win
Or
Win – Lose
يعني يا إما يبقى تصرف يسعدني ويسعد الطرف التاني للتصرف ده، وده النوع الأول، وده الطبيعي وده المطلوب.
يا إما يبقى تصرف يسعدني أنا ويزعل الطرف التاني..أو يكسبني أنا ويخسر الطرف التاني..أياً كان بقى المكسب مشاعر ماديات مناصب..أي شيء..
انت بقى بتعكس النوع التاني..بتخليه
Lose - Win
يعني انت الي بتخسر وهي الي بتكسب..!!
مش بقولك انك تبقى أناني..بس بقولك التصرف – في أي حاجة – يبقى مكسب للطرفين..، مفرح للطرفين، مش لطرف على حساب التاني..
فيها ايه لما تهزر معاها وتتريق عليها بخفة دم..
أو جرب تقول كلمة حلوة زي مانتا متعود، وبعدها كلمة تريقة وتربطها بيها..الأمثلة كتير..وحسب الموقف..زي المثال الي دايماً بقوله : "أنا بحب أمشي معاكي أوي..بحب أقعد اتكلم معاكي" وبعدها "عشان بتفكريني بستي الله يرحمها"..!
وجرب يبقى كل كلامك كده..وتتحكم بقى ، يا إما تزود خفة الدم..يا إما تزود التريقة، على حسب البنت الي قدامك.
2- أو غير كده، انك شايف انك مش هتعرف تعوض البنت دي..او مش عايز تخسرها، رغم انك ممكن تكون عارف بنات كتير..بس شايف انك مش عايز تخسر أي بنت فيهم.
Worst case scenario
أسوأ الفروض..
حتى لو "خسرتها!" ..ايه المشكلة؟
ايه المشكلة فعلاً..؟
في بنات غيرها كتييييييييييييييير وهتلاقي الي تتفق معاك..ومع كامل احترامي للبنات..بس دي حقيقة..مش شيء ينتقص من البنت أو الراجل ان مفيش توافق بينهم..أو أن حد فيهم مش عايز يكمل مع التاني..
ما تتعلقش بالموقف كتير..وتعيش فيه وتنسى مواقف تانية فاتت عليك عشان عيشت في موقف خلاص..عدى وفات.

Endaring man

ده احسن نوع..وأقل نوع..
باختصار النوع ده هو الراجل المغامر..المتجدد..، الي بيحب يجرب كل جديد في حياته.. إن مجرد الخروج معاه شيء مثير..شيء ممتع..مش شيء ممل..
الراجل الي البنت معاه تحس بالـ Excitement
الراجل المختلف المتميز عن كل الرجاله التقليدين..عن كل الرجاله الجنتل..
ما بيعرفهاش رايحين فين ، مش انانية ولا تسلط..لأ عشان عارف انه هيبقى مفاجأة ليها..
في الآخر..عايز أقولك حاجة مهمة جداً..
ما تفتكرش عشان انت تقليدي أو حتى النوع اللطيف، انك ما تعرفش تبقى النوع الأخير ده..لأ صدقني سهل..بس أهم حاجة انك تاخد مع نفسك القرار..انك تبقى النوع ده..
يلا أشوفك في مواضيع تانية..،

تسلم
كلام جااااااااامد