الانجذاب (Approachable)

ببساطة، هتكلم في الموضوع ده عن إزاي تكون Approachable
يعني ايه..
يعني إزاي تكون الراجل الي البنت تفكر جواها، أكلمه إزاي..
ولو الظروف كانت في صفك..هتكلمك فعلاً..
ما تستغربش..آه ممكن طبعاً، عشان بتفكر بس بعقلية الراجل الدوغري – الي اتكلمنا عنها في أول موضوع – بيتهيألك انه ما ينفعش..لكن صدقني ينفع، طب ليه ؟
عشان – برده ببساطة – البنت شايفه انه نادر جداً – جداً جداً – تلاقي راجل بيفهم..بيفهم يعاملها ازاي، بيفهم يتكلم ازاي، بيفهم إزاي يكون دمه خفيف من غير تكلف..بيفهم إزاي يقود العلاقة بدون غرور..يفهم ازاي يكون واثق في نفسه..
ولما البنت بتشوف كل ده في حد..وقتها بقى تبدأ تفكر إزاي تشده ليها.. إزاي تكلمه، طريقة البنات عادة بتبقى إنها بتبعت اشارات..الراجل يفهمها، وياخد هو الخطوة الأولى..طريقة safe .. حتى لو انت ما خدتش رد فعل على الإشارات دي..عادي هي ما عملتش حاجة عشان شكلها يبقى وحش، لا قدام حد ولا قدام نفسها..
لكن لما بيبقى الراجل فعلاً فيه كل الي اتقال عليه ده..وشايفه انها مش هتشوف حد زيه كده..وقتها بس، هيا الي هتكلمه .

طيب إزاي؟؟
إزاي تكون الشخص ده،
بص انا مش هضحك عليك وأقولك اني هغيرك..عارف ليه ؟
لأنك أصلاً مولود كده..!
آه مولود كده، مولود فيك الجينات والثقة الداخلية الي تشد أي بنت ليك..دي فطرتك، لكن البيئة والتربية الغير مناسبة..هي الي خليتك متخيل انك مش كده..
هي الي خليتك اول ما تشوف بنت حلوة، تفكر "اتكلم إزاي" عشان أعجبها..! "أمشي إزاي" عشان "أظهر" واثق..حتى ممكن تكون فكرت في "أقعد ازاي"، "أبصلها إزاي"، "أضحك إزاي"..
كل الكلام ده حلو جداً..لكن تعمله عشانك انت..مش عشان تعجبها !
انا بعمل كل المواضيع دي عشانك انت، لما هتعمل كل ده عشانك انت، هي مش هتملك غير انها تتشد ليك..
عشان ما أطولش عليك أبدأ في الموضوع – آه كل ده و لسه ما بدأتش – ، ناس كتير بتقولك المظهر مش مهم..الإنسان مش بمظهره، الإنسان مش بلبسه الإنسان مش مش مش..
برده حاجة من الحاجات الغلط الي اتربينا عليها..
أي نعم المظهر مش بأهمية الجوهر..لكن الاتنين مهمين..لو هنوزع الأهمية بينهم..هيبقى الجوهر 55% ، والمظهر 45%..

تخيل معايا شجرة..جذورها ثابته جداً في الأرض، قوية..، مثبته الأرض كويس، لكن منظرها من بره مش حلو..، مفيش ورد، مفيش ورق، مفيش حاجة !
بالظبط، لو اهتميت بالجوهر بس هتبقى كده بالظبط..، مين هيقرب لشجرة زي دي، مفيش حاجة في الشجرة دي Approachable ..مفيش حاجة تخلي الناس تقرب منها..
يبقى احنا دلوقتي متفقين ان المظهر الخارجي مهم جداً..ولازم تهتم بيه..

دي أول نقطة..المظهر الخارجي مهم.

قريت مرة قبل كده جملة بتقول : Always wear a story ..
أي نعم مش متعلقة بكلامنا..لكن ليها معنى مهم جداً..
وبتنفع كمان لما الكلام يخلص معاك..، يعني ايه ؟
يعني تكون لابس حاجة – عالأقل – مميزة، حاجة وراها قصة من طفولتك.. ساعة عزيزة عليك.. ربطة كوتشي غريبة..، كل واحد والستايل بتاعه.. بس البس أي حاجة وراها قصة..أي حاجة مميزة.
صدقني البنات بتلاحظ الحاجات دي..البنت قوة ملاحظتها أقوى من الراجل بكتير جداً..ده واقع ولازم تتقبله.
ايه المميز في مظهرك لو لابس لبس عادي ممل..
لو مش قادر تفهم الخطوة دي..يبقى أول حاجة تعملها..غير ستايل لبسك، جرب تلبس ستايل تاني وشوف هتحس فيه بإيه..، مالكش دعوة برأي الناس
وخلي بالك انا مش بقولك البس لبس عبيط وما يهمكش حد..لأ خالص، لكن قصدي جرب ستايل تاني..لو بتحب تلبس واسع اصلاً..جرب المقاس المظبوط ، المناسب، لو بتحب اللبس الهادي، جرب تي شيرت أو تي شيرتين فيهم شوية شغل أو شوية ألوان، لو بتحب اللبس السادة أو اللون الواحد، جرب الكاروهات ايه المشكلة..
هتقولي حاسس انك مش هيليق عليك..
أيوة طب وايه الي خلاك تحس ان ستايلك الحالي لايق عليك؟
بالظبط، عشان جربته وارتحت فيه، طب وايه المشكلة اما تجرب حاجة تانية ؟

يبقى دي تاني نقطة..Always wear a story ..، او جرب ستايل مختلف .

في الموضوع الاولاني اتكلمت عن النقطة دي بس باختصار شديد..وهي نظرتك للي حواليك..
أصدي إزاي تبص للناس، باختصار عايزك لما تبص للناس – راجل أو بنت بقى – بص في عينهم لحد ما هما يبصوا النحية التانية..
البنات..عشان بتديك ثقة رهيبة لما تخلي البنت تبص النحية التانية عشان انت بصيت في عنيها أوي..قوة نظرتك ليها هي الي خليتها تبص بعيد..اه انت بتقول لنفسك كده، ودي الحقيقة فعلاً..
طب والرجاله ليه ؟
باختصار برده، عشان ده هيخليك اجتماعي اكتر، الناس الي هتبصلها كده هتحس براحة وهيا بتكلمك..هتبقى اجتماعي، حواليك ناس كتير..
طب فكر معايا كده..البنت لما تشوف حد دخل مكان ما يعرفش حد فيه..وفي دقايق اتصاحب على كل الي شغالين فيه..وعلى ناس كمان قاعدين فيه..وبكل هدوء وسلاسة..وبكل ثقة، هتقول في نفسها ايه ؟
قولها انت بصوت عالي وسمعها لنفسك..
برده كل ده ليك انت..عشانك انت، انت بتعمل كل ده عشان حياتك كرجل..انجذاب البنت ليك بييجي مع كل ده تلقائي..
في أسهل من كدة ؟
زمان وأنا صغير قريت جملة، في كتاب اسمه تسالي الليالي للأطفال، كانت بتقول : إذا أردت لفت نظر الناس إليك..فإنظر إليهم !
يعني حتى في النظرة..خليك صاحب المبادرة..صاحب الخطوة الأولى.
بمعنى آخر..never break an eye contact ..ما تقطعش نظرة عين

ودي تالت نقطة..never break an eye contact .

بعد كده..حاجة مهمة جداً وكتير مننا مش واخدين بالهم منها..وهي طريقة مشيتك..
انت مستعجل؟؟ بتمشي يعني وراك حاجة مهمة؟
أكتر من 90% من الرجالة بيمشوا بسرعة..، ليه مش قادر أفهم، أحد ألغاز الكون الي مش قادر أوصل لحل ليها – لحد دلوقتي - ..!
ومش المشي بس..أي حاجة، يقرأوا بسرعة، ياكلوا بسرعة، يتكلموا بسرعة، حتى عايزين يتعرفوا بسرعة ويحبوا بسرعة وبسرعة بسرعة بسرعة..ايه ياعم !!
في ايه؟
هدي نفسك..امشي على مهلك، لا بسرعة ولا ببطىء ، امشي بإتزان، المشي بهدوء بيعلم الرزانة في التفكير ، والرزانة في اتخاذ القرار..
ما تمشيش بسرعة الا في حالة واحدة بس..لو كنت بتعدي طريق فيه عربيات!
غير كده امشي على مهلك..امشي برراحة، بهدوء، بإتزان، على فكرة المشي بهدوء يوحي بالثقة في النفس..أنا واحد واثق في نفسي ، ماشي بهدوء..بس !
وفكر في كل حاجة كدة..مش مشيتك بس الي بتمشيها بسرعة، زي ما قلتلك لو فكرت في حياتك هتلاقيك عايز تعمل كل حاجة بسرعة..ولو ما حصلش الي انت عايزه تكتئب..وتزعل، عشان النتيجة ماجتش زي مانت عاوز..
دايماً خد وقتك في كل حاجة..لما تمشي امشي براحتك..لما تتكلم اتكلم بهدوء، ما تتكلمش بسرعة عشان كلامك يبقى واضح ومفهوم..كلم نفسك من جوا وقول هدووووووء..واتكلم بهدوء..وهكذا في كل حاجة تانية في حياتك..
دايماً خد وقتك..ودي آخر نقطة معانا النهاردة..
يلا، أشوفك الموضوع الجاي .

هههههههههههههههه اى خدمة يارجاله ادعولى بقى ولو انى عارف ان فى بنات هيدعوا عليا