ثقافة الاختلاف مع البنات (الجزء الثانى) "تصحيح الاخطاء"

الأول يعني ايه تصحيح الأخطاء..ببساطة يعني هكلمك عن حاجات كنت فاهم انها طبيعية، أو انها الصح، مع انها غلط جداً، ولو جابت نتيجة بتجيب نتيجة عكسية..

الموضوع الي فات - ثقافة الاختلاف مع البنات - اتكلمنا عن أربع حاجات :
1- فكر كبنت لراجل مش كراجل لبنت..، يعني بص على نفسك من عنيها عشان تعرف بتفكر في الي قولته أو عملته ازاي.
2- في كلامك معاها خليك مميز..لو جربت ترخم عليها بخفة دم مش هتتضايق منك..الموضوع أبسط من كدة.
3- خلي ليك بدائل واختيارات..Have options.
4- قد العلاقة..وخليك قادر تاخد قراراتك لواحدك.

كل النقط الي فاتت دي..تهم الي فعلاً يعرف بنت..لكن مش عارف يعاملها ازاي..أو بيعاملها بطريقة هوا فاكر انها هتعجبها..لكن بيلاقي رد فعل غير الي متوقعه..حتى عشان كده أكدنا على نقطة فكر كبنت لراجل لو عايز تعرف رد فعلها.

لكن في ناس بتسألنى..طب الي مش عارف يكلم بنت اصلاً..؟
يعني بمعنى آخر..إزاي أتكلم مع البنت لأول مرة..
إزاي أبقى بتكلم على طبيعتي في أي موقف فيه بنت، حتى لو معرفهاش..حتى لو أنا الي روحت كلمتها..

وناس طلبت النقطة دي بالذات..البداية..
يقولوا ايه ويبدأوا ازاي..

يبقى ان شاء الله..ده الي هكلمك عليه..،

بس عايز أسألك سؤال..تعرف ايه هيا أهم حاجة تقولها لبنت..؟

فكر شوية..

أول كلمة بتقولها هيا أهم كلمة في وجهة نظرك..مش كدة؟

لأ..المفاجأة بقى..، إن أهم كلمة..، هي تاني كلمة - أو جملة - بتقولها بعد ما تبدأ الكلام..!

آه تاني جملة..انت قريت صح..، لكن ليه ؟

عشان أول كلمة دي أي حد ممكن يقولها..أي نعم مش كل الكلام كل الناس تعرف تقوله..عشان باختصار شديد..جسمك مش هياخد الحركات المناسبة للكلام ده لو انت سامعه أو حافظه من حد..يعني كإنك بتقول كلام وجسمك بيقول كلام تاني..ده جزء من حاجة اسمها ال Body language control..

لكن مع كده..في كلام عام كل الناس تعرف تقوله..

بمعنى آخر..أول كلمة ممكن أي حد يقولهالك وتقولها..لكن الي بيبين فعلاً ثقتك في نفسك..الي هتقوله بعدها..

هتتأثر بالموقف؟ هتتأثر انك بتكلم بنت ومش هتعرف تكمل الكلام الي بدأته؟؟

هتبدأ بقى نفسك تقولك ايه الي بتعمله ده..انا مش عارف أقول ايه..، دي كلمة تتقال لبنت معرفهاش !!..

يا ترى شكلي ايه قدامها..، يا ترى هتقول عليا ايه..على فكرة كل ده هيا مشيت خلاص وانت بتكلم نفسك !

أقولك مفاجأة تانية؟ - الأولى كانت ان تاني كلمة هي الأهم -..

ممكن تبدأ الكلام بأي حاجة..

هاي، أهلاً، صباح الخير..الكلمة نفسها ما بتهمش أد الطريقة الي انت بتقولها بيها..بتقولها وانت حاسس من جواك انك شكلك مش حلو..ولا بتقولها وانت واثق من نفسك..انت بس هتقول صباح الخير..هيا شتيمة؟؟


ما تفكرش ايه أول حاجة هتقولها..ما بتفرقش..المهم ما تتأثرش بالموقف..وتعمل الشيء الخيالي الي انت بتسميه..

" رهبة الموقف "

وما تكلمش نفسك وانت بتكلم أي بنت..، هتفكر في موقفين مع بعض ازاي..ولو حصل، هل هتبقى مرتاح وانت بتكلم بنت وبتضحكلها، ومن جواك بتقول ايه الي بقوله ده ؟!!


يبقى دي أول نقطة ..

أهم كلمة التانية مش الأولى..و إنك تعرف تكمل الكلام الي بدأته.

تاني نقطة بقى..مشكلة عند 99.9% من الرجاله..

ليه لما تيجي تكلم أي بنت..، سواء عارفها أو مش عارفها، بتفكر :
أقول ايه..

أو ايه الكلام الي (المفروض) أقوله..

يعني بتقول لنفسك..ايه كل الكلام الصح عشان أقوله..،

أقولك حاجة هتريحك جداً؟..عمرك ما هتقول كل الكلام صح 100%..، لازم هتغلط عشان انت بشر، ومفيش حد كامل..
ما تحاولش تدور على الكمال..ما تحاولش تبقى MR.Right أو The perfect man for her ..

فاكر لما قلتلك من شوية انها عند 99.9% من الرجاله..؟

دي حقيقة..لإن ده شيء في علم النفس اسمه Perfectionism..بيبقى عايز يكون صح في كل حاجة..في كل حاجة يقولها كل حاجة يعملها..، وببساطة..

ده مستحيل !

لما تكلم بنت..خصوصاً لو متعرفهاش..، ما تحطش على نفسك ضغط انت ما تستحقوش..كون انك بتفكر انك مش عايز تغلط ولا غلطة ده ضغط رهيب عليك..،

كلنا بنغلط واحنا بنتكلم عادي..اغلط مرة واتنين وتلاته مش مشكلة..، لإنك واثق في نفسك انك هتعرف تصلح الغلط ده بكلام تاني..

الكلام مع البنات مش سهم بياني بيبدأ من الصفر ويفضل طالع لفوق في خط مستقيم..لأ بالعكس..

ده سهم متعرج..فيه مناطق فوق ومناطق تحت..يبقى ريح نفسك..وشيل الضغط ده من عليك.

يبقى تاني نقطة..

ما تحاولش ما تغلطش..ماتحاولش تبقى 100% صح.

بعد كده..ايه نظرتك للبنت دي؟..

مش هتكلم على نظرتك ليها بناء على لبسها أو مشيتها او او..ده كلام عايز موضوع تاني..لكن باختصار ما تحكمش عليها من لبسها..ما تقولش عشان مش محجبة تبقى سهلة وهعرف اكلمها..ومش عشان هيا أمورة جداً يبقى تقول لنفسك لأ مش هعرف اكلمها..ومش عشان هيا وحشة تقول لنفسك دي سهلة هعرف أكلمها واخد رقمها كمان..!

عارف الكام سطر الي فاتوا دول..مش موضوعي اصلاً..ومش الي أنا أقصده في النقطة دي..!

الي أقصده..هتعتبر البنت ليك ايه ، في أول مرة بتكلمها..؟

غريبة عنك..مش كدة ؟

لأ مش كدة..غلط، فكر فيها كإنك تعرفها من زمان..ولو عرفت اسمها كلمها باسمها كإنك عارفها من زماااااااان..ورخم عليها بخفة دم زي ما اتفقنا برده كإنك عارفها من زمان..

لو كلمت كل بنت كإنك عارفها من زمان..، انت نفسك هترتاح في الكلام معاها..وعلى فكرة الإحساس بالراحة مُعدي..يعني بيتنقل من شخص للتاني..

لو كلمتها وانت مرتاح نفسياً وشايل من عليك أي ضغط..صدقني هتفرق معاك كتير.

وهتلاقي طريقة كلام " الإنسان الآلي" راحت لواحدها..

يبقى تالت نقطة..

كلمها كإنك عارفها من زمان..

كده دي آخر نقطة النهاردة. وان شاء الله انتظرونى فى مواضيع جديدة قريب

جميل جدا جدا اشكرك على الموضوع

شكرا يارجاله على ردودكم المشجعة وان شاء الله انتظرونى فى المواضيع اللى جايه

جميل وتسلم ايدك والله
علي فكره ان ولد يكلم بنت مش صعبه خالص هو بس بيخاف ويفتكر انها هتحرجه وده هيبقي صعب ليه وفي بنات كتير بتعمل كده وده غلط
يعني مثلا لو ولد ماشي قدامي دلوقتي وقال السلام عليكم مش هرد لا طبعا هرد عليه فيها ايه محصلش حاجه يعني مش صعبه وممكن بطريقه حلوه يبقي في حوار بينا
في بنات بتفهم ده غلط وتقولك احرجه ويتفرح بالعكس هيا ترد عليه عادي مادام كان محترم معاها وفي بنات
المهم في ده كله بس الطريقه اللي هيتكلم معاها بيها لو البدايه كويسه الباقي كله امره سهل

sara fares كتب:

جميل وتسلم ايدك والله
علي فكره ان ولد يكلم بنت مش صعبه خالص هو بس بيخاف ويفتكر انها هتحرجه وده هيبقي صعب ليه وفي بنات كتير بتعمل كده وده غلط
يعني مثلا لو ولد ماشي قدامي دلوقتي وقال السلام عليكم مش هرد لا طبعا هرد عليه فيها ايه محصلش حاجه يعني مش صعبه وممكن بطريقه حلوه يبقي في حوار بينا
في بنات بتفهم ده غلط وتقولك احرجه ويتفرح بالعكس هيا ترد عليه عادي مادام كان محترم معاها وفي بنات
المهم في ده كله بس الطريقه اللي هيتكلم معاها بيها لو البدايه كويسه الباقي كله امره سهل

كلامك صح جدا ياسارة بس للاسف فى بنات كتيييييير مبتعملش كده وفى ولاد اكتر بتتكسف جدا يعنى انا فى مرة قلت ادخل منتدى ودخلت قسم المشاكل العاطفية قلت اشوف الناس ايه مشاكلهم لقيت كل المشاكل او معظمها انا بحب واحدة ومش عارف اكلمها او عايز اكلم واحدة ومش عارف انا مكنتش متخيل ان الموضوع صعب للدرجادى عشان كدا قررت انى ابدأ اعمل السلسلة دى وان شاء الله مش هتقف شرفنى مرورك وردك ياعسل